1Pe 3 | NdeIBE | STEP | Ngokunjalo, bafazi zehliseleni kubomkenu ukuze kuthi uma abanye babo bengalikholwa ilizwi, bahugeke ngokuziphatha kwabomkabo kungekho kukhuluma,

1 Peter 3

Abesifazana labomkabo

1 Ngokunjalo, bafazi zehliseleni kubomkenu ukuze kuthi uma abanye babo bengalikholwa ilizwi, bahugeke ngokuziphatha kwabomkabo kungekho kukhuluma, 2 lapho bebona ukuhlanzeka lenhlonipho yokuphila kwenu. 3 Ubuhle benu kabungaveli ekuziceciseni kwangaphandle, okunjengezinwele ezelukiweyo lokugqiza izigqizo zegolide kanye lokugqoka izigqoko ezinhle.

4 Kodwa kumele bube ngobangaphakathi kwenu, ubuhle obungapheliyo bomoya omnene lothuleyo, oligugu elikhulu emehlweni kaNkulunkulu.

5 Ngoba le yiyo indlela abesifazana abangcwele bakudala ababethembe uNkulunkulu ababejwayele ukuzicola ngayo. Babezehlisa kubomkabo, 6 njengoSara owalalela u-Abhrahama wambiza ngokuthi yinkosi yakhe. Lingamadodakazi kaSara uma lisenza okulungileyo njalo lingavumeli ukwesaba.

7 Ngokufanayo, madoda ekuphileni kwenu labomkenu wobani lozwelo, libaphathe ngenhlonipho njengababuthakathaka labayizindlalifa kanye lani zesipho sokuphila esomusa, ukuze kungabi lalutho oluzavimbela imikhuleko yenu.

Ukuhluphekela ukwenza okulungileyo

8 Okokucina lonke hlalisanani ngokuthula; wobani lozwelo, lithandane njengabazalwane, libe lesihawu kanye lokuthobeka.

9 Lingabuyiseli okubi ngokubi loba inhlamba ngenhlamba, kodwa ngesibusiso, ngoba labizelwa ukuze lizuze ilifa lokubusiswa.

10 Ngoba, “Lowo othanda ukuphila abone lezinsuku ezinhle kumele anqande ulimi lwakhe kokubi lezindebe zakhe ekukhulumeni inkohliso.

11 Kumele aphenduke kokubi enze okulungileyo; kumele adinge ukuthula akulandele.

12 Ngoba amehlo eNkosi aphezu kwabalungileyo, lezindlebe zayo ziyayilalela imikhuleko yabo, kodwa ubuso beNkosi bumelana lalabo abenza okubi.”

13 Ngubani ozalilimaza uma litshisekela ukwenza okulungileyo na?

14 Kodwa lanxa lingahlupheka ngenxa yokulungileyo, libusisekile. Lingakwesabi lokho abakwesabayo; kalingethuswa. 15 Kodwa yamukelani uKhristu ezinhliziyweni zenu njengeNkosi engcwele. Hlalani lilungele ukuphendula loba ngubani olibuza isizatho ngethemba elilalo. 16 Kodwa lokhu kwenzeni ngobumnene langenhlonipho, lilesazela esihle, ukuze kuthi labo abakhuluma okubi ngokuziphatha kwenu okuhle kuKhristu bayangeke ngokuhlambaza kwabo.

17 Kungcono, uma kuyintando kaNkulunkulu, ukuhlupheka ngenxa yokwenza okulungileyo kulangenxa yokwenza okubi. 18 Ngoba uKhristu wafela izono zenu kwaba kanye, olungileyo efela abangalunganga, ukuze alise kuNkulunkulu. Wabulawa emzimbeni kodwa wavuswa nguMoya, 19 wahamba ngaye wayatshumayela emimoyeni eyayisentolongweni yona

20 engalalelanga kudala lapho uNkulunkulu walinda ngokubekezela ezinsukwini zikaNowa umkhumbi usakhiwa. Phakathi kwawo abantu abalutshwana nje kuphela, abaficamibili bebonke, basiliswa ngamanzi, 21 njalo amanzi la afanekisa umbhaphathizo osusilisa lani futhi – kungayisikho kususa ingcekeza emzimbeni kodwa kuyisibambiso sesazela esihle kuNkulunkulu. Siyalisilisa ngokuvuka kwabafileyo kukaJesu Khristu, 22 oseye ezulwini njalo usesandleni sokunene sikaNkulunkulu – lezingilosi, leziphathamandla kanye lezikhulu ekuzehliseni kuye.